ANA SƏHİFƏ>Hadisə

11-04-2017, 13:41


Bakının mərkəzində məscid davası FOTO

Bakının mərkəzində məscid davası FOTO

Oxunub:1540


Hökumətin “Sovetski”də məscid sökmək istəyi sərt etirazla qarşılandı

Məscidin sökülməsinə AXCP sədri Əli Kərimli Facebook səhifəsində münasibət bildirib:

“Hökumət “Sovetski”də Hacı Cavad məscidini sökməyə hazırlaşır. Məscid XIX əsrdə tikilib və rəsmən tarix və mədəniyyət abidəsi hesab olunur. Erməni kilsəsi deyil ki, pulsuz qaz versinlər, məscid sökmək çoxdankı hobbiləridir. Xeyli həmvətənimiz də sual verir ki, İslam Həmrəyliyi Oyunları ərəfəsi məscid sökmək nə imiş? Həmin dostlar nəzərə alsınlar ki, Avropa Oyunlarında da, İslam Həmrəyliyi Oyunlarında da bunları özünə cəlb edən Oyundur və Oyun hesabına pul silməkdir. Əslində isə nə Avropa bunlara maraqlıdır, nə də islam həmrəyliyi”.

***

Son məlumatlara görə polis “Sovetski” məhəlləsi yaxınlığında yerləşən, sökülməsi gözlənilən “Hacı Cavad” məscidinin ətrafından çəkilib.

Hazırda ərazidə heç bir polis gözə dəymir. Məscidin qarşısında 200-dən çox dindar gözləməkdədir. Onlar təkcə həmin ərazidə yaşayanlar deyil, Bakının müxtəlif yerlərindən-Günəşlidən, Binədən, Hövsandan gələnləri də var. Toplaşanlar deyirlər ki, “Hacı Cavad” məscidinə ibadət üçün gəlirdilər və indi binanın sökülməsi xəbərlərindən narahat olublar. İstəmirlər ki, tarixi abidə kimi qorunan bu məscid sökülsün.

***

«Ən qəti şəkildə biz məscidlərin sökülməsinin əleyhinəyik. Bu barədə lazımı qurumları məlumatlandırmışıq».

Bunu Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə Bakıdakı «Hacı Cavad» məscidinin söküləcəyi ilə bağlı deyilənləri dəyərləndirərkən bildirib.

Bakı şəhəri, Çingiz Mustafayev küçəsi, 20-də yerləşən «Hacı Cavad» məscidinin söküləcəyi ilə bağlı bəzi insanlar arasında narahatlıq var.

Bu haqda AzadlıqRadiosuna hadisə yerində olan şəxslər danışıblar.

Bu gün, aprelin 12-si 200-ə qədər şəxs həm məscidin önündə, həm də daxilində gözləyərək buna mane olmaq istədiklərini deyirlər: «Hələlik söküntü başlamayıb, amma bizə məscidi boşaltmaqla bağlı xəbərdarlıq verilib».

Bu məscid çox hissəsi sökülmüş keçmiş «Sovetski» məhəlləsinə yaxındır. Onun söküləcəyi ilə bağlı cəmiyyət arasında çoxdandır narahatlıqlar dolaşır.

Ancaq Dini Qurumlarla İş üzrə Dövlət Komitəsi belə məlumatları təkzib etmişdi.

İki gün öncə, aprelin 10-da isə vəkil Cavad Cavadov məscidin taleyinə aydınlıq gətirməkdən ötrü Yasamal rayon İcra Hakimiyyətinə sorğu göndərmişdi. «Bu məscidi Mədəniyyət və Turizm Nazirliyi yeni aşkar olunmuş tarix və mədəniyyət abidələrinin siyahısına daxil edib. Məscidin sökülüb-sökülməməsi ilə bağlı vəziyyət qeyri-müəyyəndir», – deyə vəkil jurnalistlərə də bildirmişdi.

C.Cavadov əlavə etmişdi ki, sökülmə qərarı verildiyi halda həmin qərarın məhkəmə qaydasında mübahisələndirilməsi məsələsi nəzərdən keçiriləcək: «Lakin reallıqda bu tipli söküntülərin ildırım surəti ilə həyata keçirildiyini anlayırıq. Yenə də inanırıq ki, belə niyyətləri olan məmurlar bundan vaz keçəcəklər».

Vəkilin sorğusuna, hələlik, cavab verilməyib.

Hazırda Yasamal rayon İcra Hakimiyyəti başçısı İbrahim Mehdiyev də hadisə yerindədir. Ancaq məsələ ilə bağlı o, jurnalistlərin sualına cavab verməkdən imtina edib.

Hadisə yerində polislərin də olduğu bildirilir.

 

dle